Cine de serie B

Iste articlo ye sobre un tipo concreto de cintas, encara que no sobre un chenero cinematografico; ta atros usos, se veiga Serie B.

Se conoix con os nombres de cinta de cine B, cine de serie B u simplament como cinta B u cine B a un tipo concreto de cintas no perteneixent a garra chenero cinematografico pero con a caracteristica comuna de no estar una cinta destinada a la suya exhibición independient en una sala de cine, so que a la suya exhibición en ditas salas como acompanyamiento d'una atra cinta prencipal, en uns sesión doble. O nombre poseye connotacions negativas, en considerar-se que istas cintas yeran inferiors a las cintas principals, de modo que no gosaban estar cintas que mereixesen l'atención d'a critica cinematografica. Posteriorment, o sentiu orichinal trascendió y actualment se fa servir mas que mas ta designar a cintas que no son protagonizadas por actors conoixius u destacaus y que gosan tener un guión cinematografico feble, en consonancia con o baixo presupuesto destinau a la producción cinematografica d'a cinta y con a nula inversión en publicidat.

A epoca de producción masiva de cintas de serie B (en o suyo sentiu orichinal) remató dende meyaus d'os anyos 1950 pero lo mesmo nombre continó fendo-se servir, encara que ista vegada ya dotau de bella ambigüidat en referise d'una man a cintas con un alto grau d'artesanía y d'inchenio esteticoy d'atra man a cintas con muit baixo presupuesto y que lo suyo obchectivo ye nomás que la suya explotación economica sin garra intrés artistico. Asinas, o nombre conserva ista ambigüidat d'os anyos 1950 y designa ya sía a cintas de bel chenero sin garra ambición artistica ya sía a cintas que busvan liberar-se d'as restriccions y convencionalismos d'o cine moderno, estando cintas con mas presupuesto pero que no deseyan tener tampoco la consideración de cintas de cine d'autor u de cine independient.

En cualsiquier caso, a mayor parte d'as cintas de serie B perteneixen a bels cheneros cinematograficos particulars: en a epoca dorada d'o cine de serie B se tractaba de cintas de cine de western y mientres os anyos 1950 se popularizoron as cintas de serie B de cine de ciencia-ficción y cine de terror. D'atra mar, bella cosa d'as primeras cintas de serie B gosaban emplegar o mesmo personache principal ta cuantas cintas.

A tamas d'a suya percepción cheneralmente despectiva ta bel uns, bels directors (y atras personalidaz vincladas a lo mundo d'o cine) han amostrau o suyo afecto por iste tipo de cinta, como Quentin Tarantino u Robert Rodriguez, que en bellas peliculas destacadas con alto presupuesto n'han feito referencias, u directament las han homenachiau, como s'escaició con Grindhouse (2007), a on construyoron una "sesión doble" en constar a cinta en realidat de dos cintas deseparadas, Planet Terror (Robert Rodriguez) y Death Proof (Quentin Tarantino), cadaguna con o suyo director respectivo, y mesmo unidas con uns tráilers falsos.

As cintas de serie B estioron a respuestas d'as grans productoras a la cayida de vendas de dentradas en os cines como consecuencia d'a Gran Depresión que siguió a lo crack de 1929 en Estaus Unius. En ixas envueltas o cine estausunidense ya heba desenrollau una gran especialización economica y industrial: dende los anyos 1920 ya existiba lo sistema d'estudios (studio system) y lo star-system, con l'aparición d'as grans estrelas cinematograficas, y tamién s'heba consolidau uns diferencia entre los diferents cheneros cinematograficos. En plegat o cine sonoro substituyindo a lo cine mudo se consolidó un oligopolio cinematografico, con o cine estausunidense dominau por as grans productoras, clamadas en anglés Majors, y que yeran: Warner Bros, Metro Goldwyn Mayer, Paramount, RKO, 20th Century Fox, Universal Studios, Columbia Pictures y United Artists (encara que ista zaguera no feba produccions propias, so que yera a lo cudiau d'a distribución cinematografica de cintas producidas por estudios independients.

• Se veigan as imáchens de Commons sobre o cine de serie B.